Genocide

Genocide

30 aña pasa kontra tur konseho di medio Ambiente sostené pa Hulanda eks Minister Presidènt Maria Liberia  a firma un kontrakt ku PDVSA pa 5 aña i despues 20 aña mas. Kasi ningun hende no tabata sa  eks Minister Presidènt Miguel Pourier a firma 5 aña mas pa redusí e kontaminashon riba promesa  di PDVSA sin ningun resultado.

E 30 aña ku a pasa PDVSA a demonstrá ku e ta un kompania KU NO POR KONFIA RIBA SU PALABRASHON NAN , pasombra loke presidente di Venezuela dekretá ta para riba tur kontakto.

Ku otro palabra loke bo firma ku PDVSA semper tin riesgo ku PDVSA no ta kumpli esaki ta eksperensia pa ku Venezuela/PDVSA.

Gabinete Minister Presidènt Asjes na su turno a base di rapòrt traha di Ecorys ku mandato di Eks Minister Presidènt Schotte a disidí  ku e refineria tin ku keda kontra tur regla humano pa laga e refineria keda i matando nos yunan di tera i susha nos Pais pasombra partido di Sr. Asjes ta haña tur sorto yudansa  di mundu di PDVSA i nos Pais i nos pueblo tin ku muri dor di tur e gasnan venenoso ku tin por lo ménos 100 komponente kontra salu di nos hendenan ku nos sa ku por lo ménos 18 hende ta muri promé ku nan ora. Gobiernu Asjes no por habri su boka kontra PDVSA.

Si mira na e nòmbernan den tim negosiadó ku ta haña un honorario pa luna di 5000 i 10 000 florin di e pueblo aki , e negoshashon aki lo terminá den un walk over pa PDVSA, ko lo haña mas poder riba nos hende , i mi no ta papia mes di hendenan ku tin eksperensia ku Venesolano. Dios spar Korsou.

Un Minister di salubridat ta papia riba kosnan bou di laman i e hende nan riba tera e no sa mes ku nan ta eksistí. Dia nos no tabata sa e efektonan ku e situashon riba hende nos por komprondé, pero awor aki organisashon nan mundial  ta primi gobièrnu nan riba e hecho.

Un pregunta shonan: Pakiko ta na Korsou mester rafiná e krudo sushi di Venesuela/Russia i manda e porkaria nan ku ta sali for di e gasnan venenoso  riba nos grandinan, nos muchanan di skol i nos habitantenan.?

Pueblo di Korsou lanta Ariba i protesta pasombra nos a pasa aden 30 aña kaba ,  No bisa tin hopi hende ta traha na isla, pero aktividat di un grupo chikí no ta responsabel mas den mundu ku nos ta biba den aki,pasombra nos sushi ta afektá nos mes i otro nan ku no ta biba den e Pais aki.

Un konseho na tur ku ta lesa e artíkulo aki,ta e delaster chèns pa ku e refineria pa awor tuma e desishon pa sera e refineria na 2019, pa nos drecha nos pais i habri kaminda pa hopi hende traha den otro aktividat nan ku ta limpi pa futuro di nos yu’i i yunan.

FINALISA: KARA DI SENTRO DI NOS SUIDAT MESTER WORDU KAMBIA DEN UN SENTRO LIMPI I AGRADABEL KAMINDA HOPI DI NOS HENDENAN LO LABORA PA NAN PAN DI KADA DIA PA ANOS NAN NOS DILANTI.

Edgar Andres Leito, 16 òktober 2014