Picture of me 1

Minister Presidènt Asjes mester lanta para riba su pia patras i defendé negoshinan i propiedat nan di e pueblo , meskos ku Presidente Maduro ta hasi na Venezuela pa su pueblo.

 

Presidente Maduro su polítika ta kibra tur kontrakt ku no ta na benefisio di su pueblo, i aki na Kòrsou Pdvsa /Maduro ta humiliá nos pueblo, i abuzá di nos propiedatnan pasombra nan ta poderoso.

 

Presidente Maduro ta midi ku dos midi, hanchu pe i smal pa nos, i Pdvsa kier trose Kòrsou saka tur djus for di dje i esnan responsabel ta para tira spich bati man pa un chipichipi pa aliviá sufrimentu na final di bida di nos hendenan.

 

Venezuela a sòru pa un liña di avion di Korsou a kibra , hopi di nos hende nan a pèrdè trabou, plaka di Inselair a keda pega na Venezuela hopi luna pone e kompania kore masha kabes di gai pa e haña su plaka.

 

Awor Presidente Maduro tin un problema ku Aruba, awor Presidente ta stòp e avion nan di Korsou pasa riba Venezuela, para tur tráfiko di avion ku masha Venesolano no por bai nan kas , pone ku Inselair atrobe ta den problema grandi pa un problema ku Venezuela tin ku Aruba.

 

Presidente Maduro tin problema ku Aruba/Hulanda, i Presidente ta bini baha su rabia riba Korsou ku no tin nada di hasi ku e problema.

 

Presidente Maduro no ta sera su pòmpnan na Merka, pero ta menasa nos aki si ku e ta para e plantanan. Presidente Maduro ta reklamá Merka e ta hasié meskos ku Korsou pasombra ta nos ta e palu mas delegá.

Unda nos Minister Presidènt Asjes a keda, pa munstra Presidente Maduro  ku nos no tin nada di hasi ku su problema ku Aruba.

 

Awor pueblo di Korsou ta mira ku nos ta bou di pia di Venezuela i nos no ta tende ni mira ningun furia di Minister nan ni di nos Parlamentario nan.

Un yamada ta bai pa Minister Presidente Asjes  meskos ku Presidente Maduro ta sali pa su pueblo, dor di kibra tur kontrakt ku no ta na benefisio di su pueblo, nos aki na Kòrsou mester hasi meskos pa nos pueblo, i nos lo no muri di hamber.

 

Edgar Leito, Eks Parlamentario, 25-7-2014, tel. 5231930.